लकडाउनकाे अठ्चालिसाैैँ दिन

बैशाख २८ गते, २०७७

आज रातभरिको बर्षाले गर्दा बिहान उठ्न ढिला भएछ । वर्षा भएकाे रातकाे बिहानी पखकाे मिठाे निद्राकाे अनुभव गर्नु भएकाे छ? आज पूरा कायाकैरन सुन्न पाइएन। ६ः२० पो भुसुक्क सुतिएछ ।  नित्यकर्म पछि फेरि सुतियो । ७ः३० मा पो बल्ल ओछ्यान छोडियो । लकडाउनले त सारै अल्छि पो बनाएको छ मलाई ! हजुरको के छ दैनिकी ?आज चा चाहिँ ८ बजे खाइयो । छोरीलाई नेपालीको गृहकार्य (विद्यालयले दिएको हैन । हामीले नियमित घरमा गराइरहेको ) गराउने काम मेरै थियो । बसुन्धराकाे पकाउने । छोरीलाई क देखि ज्ञ सम्मका नेपाली व्यञ्जन वर्णहरु, अ देखि अः सम्मका स्वरवर्णहरु, दुई अक्षरले बनेका ९ वटा शब्दहरु ( याे भन्दा बढी मिसले सिकाउनु भएको छैन रे । हामीले सिकाएकाे त हुँदै हुन्न रे), आकार लागेका १२ वटा शब्दहरु, स्वरवर्णका खाली ठाउँ भर्ने गर्न दिएँ । छोरीले मज्जाले गरिन् । त्यसपछि पढेर पनि सुनाइन् । अनि उनी साथी मोटु (अनुभव खत्री) सँग खेल्न थालिन् । मैले सोसल मिडिया सर्फ गरेँ । आज भान्सामा पार्वती दिदी र बसुकै राज चल्यो । मैले सघाउनु परेन । खाना खाइ भ्याउँदा १०ः३० बजिसकेको थियो । खानपछि छोरी कपाल मिलाइदिन लागेको त्यत्ति मेसो आएन । त्यसपछि अनलाइन लर्निङ्गतिर लागियो । प्राथमिक उचार सम्बधी  एउटा पुनर्ताजगी कोर्स ६० प्रतिशत् मात्र गरियो । त्यसपछि फेसबुक ग्रुपहरु र पेजमा केही कुराहरु अपडेट गरियो । केशरसँग च्याटमा कक्षा—८ को लब्धाङ्क तयार भएको जानकारी पाएपछि  वेबसाइटबाट पनि नतिजा हेर्न मिल्ने बनाउने सल्लाह भयो । विद्यालयमा पुग्दा केशर सर र ज्ञानराज सर अगडि नै पुगेर तयारीमा लाग्नु भएको थियो । मैले परीक्षा सेटिङ्ग गरेपछि यहाँहरुले नम्बर भर्ना थाल्नुभयो । म,डोर विक्रम सर र यमबहादुर दाइ महेन्द्र मा.वि.को कम्प्युटर ल्याब हेर्न गयौँ । सिकर्मी बोलाउने र डिजाइन फिक्स गर्ने सल्लाह भयो हामी तीनजनाको । ल्याब हेरी पर्कदा २ः३० बजिसकेको थियो । सरहरुले मार्क इन्ट्री गर्दै हुनुहुन्थ्यो । केहीबेरमा मार्क  इन्ट्री सकाउनु भयो । अनि लेजर निकालेर प्रुफ रिडिङ्ग गरेर लेजर निकालियो र नजिता अनलाइनमा प्रकाशन पनि गरियो । त्यसपछि रुममा फर्कदाँ ४ बज्नै लागेको थियो भने खाजा पनि तयार हुँदै थियो । आज खाजामा सुख्खा रोटी घिउ, मह र चिया खाइयो । त्यसपछि ज्ञानराज सरको सिफारिस अनुसार आइफिलिक्समा कबड्डी कबड्डी कबड्डी फिल्म हेरियो । ठीक्कै लाग्यो । आज कतै पनि जूम ट्रेनिङ्गमा सहभागी भइएन । रामराज्य मा.वि. २०५६ व्याचमा हल्का च्याट भयो नारायण सरसँग । सर साथीहरु जुडाउन जोडतोडले लाग्नु भएको छ । मैले त्यत्ति सहयोग गर्न पनि पाएको छैन । आज पनि ३ जना साथीहरु गणेश कार्की, टोपला तिमिल्सेना र देवकला तिमिल्सेनाको प्रोफाइल खोजेर ग्रुपमा पठाउनु भएको थियो । उहाँहरुलाई एड् गरियो ।  खाना खाने तरखर गर्दा ८ः१५ बजिसकेको थियो । खाइबरी यो डायरी लेख्ने तरखरमा लागेँ । मैले डायरी लेख्दै गर्दा छोरीले बुट्टे रुमाल बोलको गीतमा नृत्य गरिन । अचेल छोरीलाई नृत्यको खुब रहर जागेको छ ! मलाई पनि हिजोदेखि बल्गमा डायरी लेख्ने सनक चढेकाे छ । ओहो ! हेर्नुस् त १०ः१० पो हुन थालेछ । अब त सुतौँ है ! शुभ रात्री ।